நேற்று இல்லை நாளை இல்லை எப்பவும் நான் ராஜா!

பொட்டல் காட்டிலும், புழுதிக் காட்டிலும் ஆர்மோனியம் வாசித்துக் கொண்டிருந்த ஒருவர்  மேற்கத்திய இசையைக் கற்று மேற்கத்தியர்களே அசந்து போகும் அளவிற்கு உயர்ந்திருக்கிறார்; உடன், இளையராஜா அவர்களின் இசைக் குறிப்புகளுக்கு அவர்கள் வாசிப்பதற்கெல்லாம் எவ்வளவு பிரயத்தனம் செய்திருக்க வேண்டும் என்று நினைத்தாலே பிரமிப்பாக இருக்கிறது.

டோரதி திரைப்படத்தின் இசைத் துணுக்கு ஒன்றை Mikel Toms அவர்கள் Conduct செய்ய London Royal Philharmonic Orchestra அதனை வாசிக்க இளையராஜா அவர்களும் இயக்குனர் கார்த்திக் சுப்பராஜ் அவர்களும் கணினி வழியே பார்க்கும் இந்த காணொளியை பார்க்கப் பார்க்க அவ்வளவு நெகிழ்ச்சியாக இருக்கிறது. 

இதே இசைக்குழு தான் இளையராஜா அவர்களின் Valiant சிம்பொனியையும் இசைத்திருந்தார்கள். அந்த நிகழ்வை நேரடியாக பார்க்கவும் கேட்கவும் காலம் எனக்கு நல்வாய்ப்பை அளித்தது. 

இளையராஜா எனும் இசைப் பேராளுமை குறித்து பலருக்கு பலவித கருத்துகள் இருக்கலாம், ஆனால் தமிழர் வாழ்வின் எல்லா விதமான உணர்வுகளுக்கும் இசையைத் தந்திருக்கிற அவரது படைப்புகள் இந்த பிரபஞ்சம் அழியுமட்டும் இசை ரசிகர்கள் மனதில் நிலைக்கும் என்பது குறித்து மாற்றுக்கருத்துகள் கட்டாயமாக இருக்க முடியாது. 

இந்த வீடியோவில் இசைக்குறிப்புகளை தந்து விட்டு ஒன்றுமறியாதவர் போல் கரங்களை பின்னால் கட்டிக் கொண்டு நிற்கும் அந்த படம் ஒரு கலையம்சம் கொண்ட Frame 🥰❤️. இளையராஜா அவர்களது கரங்களுக்கு அன்பு முத்தங்கள். 

-----

சில தன்விளக்கங்கள் இனி...

இளமையில் ஏ. ஆர் ரஹ்மான் அவரகளது இசையை அதிகம் கேட்டு வளர்ந்து அந்த பிரமையில் மூழ்கி புதுப்பட கேசட் எப்போது வந்தாலும் முதல் நாளே வாங்கி விடும் வழக்கம் வைத்திருந்தேன்.

இளையராஜா அவர்களின் இசையில் காசி பட கேசட் தவிர்த்து வேறு எதற்கும் பணம் கொடுத்து வாங்கிய நினைவு இல்லை. எனது அறியாமையால் இளையராஜா அவர்களின் இசை மீது அவ்வளவு நாட்டம் இல்லாமல் இருந்தேன்.

இதற்காகவேத்தான் மார்ச் 8 2025 அன்று லண்டனில் Mikel Toms அவர்கள் நடத்திய இளையராஜா அவர்களின் முதல் சிம்பொனியான Valiant - ஐ கேட்க யார் வரவில்லையென்றாலும், எவ்வளவு செலவானாலும் பரவாயில்லை நாம் அந்த வரலாற்றின் பக்கம் நிற்க வேண்டும் என்பதற்காக நேரடியாக சென்று ரசித்தேன்.

அதை, தமிழர் ஒருவர் அதிலும் ஆசியாவிலே முதல் முறையாக ஒருவர் சிம்பொனி இசையை கோர்த்திருக்கிறார், அதை எப்படி தவற விடுவது என்கிற அடிப்படையிலும், லண்டனுக்கு அருகிலிருந்தும் நாம் செல்லவில்லையென்றால் எப்படி என்பதாலும், இளையராஜா அவர்களுக்கு இந்த வழியிலாவது நன்றி சொல்லவும், மரியாதை செலுத்தவும் ஒரு வாய்ப்பாக கருதி Hammersmith Eventim Apollo அரங்கிற்கு சென்றிருந்தேன். 

இசைப் பேரரசர் இளையராஜா வாழியவே!

ஆரிய மாயைக்கே சவால் விடும் திராவிட மாயை!

திமுகa வை தோற்றுவித்த அண்ணாதுரை அவர்கள் வர்ணாசிரமம், சாதி எதிர்ப்பு, ஆரிய ஆதிக்கம் குறித்து எழுதிய பல்வேறு கட்டுரைகளின் தொகுப்பு தான் ‘ஆரிய மாயை’ எனும் புத்தகம். 1947 ல் வெளிவந்து பின்னர் சென்னை மாகாண அரசால் தடையும் செய்யப்பட்டிருக்கிறது. 6 மாதங்கள் சிறையிலும் இருந்திருக்கிறார். 

அப்படியான தலைவரைக் கொண்ட திமுக இன்று செய்யும் செயல்கள் எல்லாம் ஆரிய மாயையை மிஞ்சும் திராவிட மாயையாகி இருப்பது எவ்வளவு பெரிய வீழ்ச்சி!! 

மேடைக்கு மேடை திருமண வீடுகளில் கூட மாற்றுக் கட்சியினரை, அவர்களுக்கு வாக்களித்த மக்களை  திமுகவினர் இழிவாக பேசுகின்றனர். 

மக்களின் வாக்குகளைப் பெற மக்கள் நலன் சார்ந்த விஷயங்களில் குறிப்பாக நீட் தேர்விற்கு எதிராக உண்ணாவிரதம் இருக்கலாமே! 

டெல்லியில் மாணவர்கள் உண்ணாவிரதம் இருந்து கல்வி மந்திரியையே பதவி துறக்க வைத்தனர். இவர்கள் இன்னும் மிசா… மிசா… என்று பழங்கதைகளைப் பேசிக் கொண்டிருக்கிறார்கள். 

2021 தேர்தலின் போது ஆட்சிக்கு வந்ததும் நீட் ஒழிக்கப்படும்; அதற்கான ரகசியம் எங்க கிட்ட இருக்குன்னு இப்போதைய எதிர்க்கட்சித் தலைவர் கூறினார்.. அப்படித்தான் அனிதாவையும் ஏமாற்றினர். பிள்ளை ஏமாற்றத்தில் தன்னையே மாய்த்து கொண்டது. 

ஆட்சியில் இருந்த வரை நீட் விலக்கிற்காக வழக்கு தொடர்ந்ததுக்கு அப்பால் வேறு எதும் செய்யவில்லை; ஒன்றிய அரசை எதிர்த்து களத்தில் போராடவில்லை சரி!! ஆனால், இப்போது ஆட்சியில் இல்லாத நிலையில் ஒன்றிய அரசிற்கு எதிராக போராட்டம் நடத்தத் தயங்குவது ஏன்! 

ஆணவக் கொலைகளுக்கு எதிராக பேசத் தயங்குவது ஏன்! ஆணவக் கொலைகளுக்கு எதிராக சட்டம் கொண்டு வருவது சிறந்தது என பேச மறுப்பது ஏன்!! 

ஆட்சிக்காக, அதிகாரத்திற்காக என்ன வேண்டுமானாலும் பேசுவோம்! சாதி பாசம் கொண்டு  இடைநிலைச் சாதிகளை ஆதரித்தும்; பட்டியலினத்தவரை கண்டும் காணாமலும் இருப்போம்! இப்படியாக உரிமைக் குரல் எழுப்புவோரை மிரட்டுவோம்!! இது தானே திராவிட மாடல்!! 

நேக்காக திராவிடம் திராவிடம் என்று பேசி விட்டு எப்படி இவ்வளவு கேவலமான அரசியல் செய்ய முடிகிறது இவர்களால்!! இவர்களின் சமூக நீதியெல்லாம் வெறும் பேச்சிலும், திரைக்கதைகளிலும், நடிப்பிலும் தான் போலும் 😔🚶🏽‍♂️

அண்ணா அவர்களின் கடமை, கண்ணியம், கட்டுப்பாடு எல்லாவற்றையும் காற்றில் பறக்கவிட்டதால் தான் இன்று ஆட்சியை இழந்திருக்கிறார்கள் என்பதைக் கூட அவர்கள் உணர மறுப்பது தான் வேடிக்கை 🤭

———

புத்தகம் - ஆரிய மாயை ॥ எழுத்தாளர் - பேரறிஞர் அண்ணா । பதிப்பாளர்- கருஞ்சட்டைப் பதிப்பகம் । பக்கங்கள் 85

Worship-ஆராதனை எனும் ஊதி பெரிதாக்கப்பட்ட மாயை

சமகாலத்தில் 2000 ற்கு பின்னர் கிறிஸ்தவ ஆலயங்களிலும், கிறிஸ்தவ மேடைகளிலும் Worship என்பதன் பெயரில் நிகழ்பவைகள் வெகுவாக அயர்ச்சியைத் தருகின்றன. 

நீரின்றி அமையாது உலகு என்பது போன்றே இசையில்லாத உலகமும் சாத்தியமில்லை. காற்று, நீர், மழை, மரங்கள், பறவைகள், பூச்சியினங்கள் என நம்மைச் சுற்றி இருப்பவைகளின் வழியே இயற்கை நம் செவிகளை இசையின்பத்தில் தொடர்ந்து லயிப்பில் வைத்திருக்கின்றன. போலவே, மனித வாழ்க்கையும் குழந்தையின் அழுகுரல் துவங்கி, தாலாட்டு, எசப்பாட்டு, தெம்மாங்கு, ஒப்பாரி வரை இசையால் நிறைந்த ஒன்று தான் 

(இவைகளுக்கு அப்பால் காதல், பிரிவு, கொண்டாட்டங்கள் என வாழ்வின் எல்லா நிலைகளிலும் இசையைத் தவிர்க்கவியலாது).

இவைகளோடு கடவுள் வாழ்த்தையும் / கடவுளைப் போற்றிப் பாடுதலையும் பொருத்திக் கொள்ளலாம். 

கடவுள் வாழ்த்து / கடவுளை போற்றிப் பாடுதல் என்கிற மட்டில் அது நிற்குமானால் சரி; ஆனால், மனித வாழ்வியலுக்கு சற்றும் இசைவில்லாத, எள்ளளவும் பொருத்தமற்ற, அதீத பகட்டையும், மின்னணு கருவிகளால், தாள நடை அதிகரிக்கப்பட்டும், அதீத ஒலியில், செவிகள் அதிர பாடப்படும் பாடல்கள் எதைக் கொண்டு வரும் என்பது விளங்கவில்லை. 

புகைமூட்டத்தில் நின்று கொண்டு, டிஸ்கோ விளக்குகள் ஒளிர, தொண்டை கிழிய பாடுகிறார்கள். இசைக்கருவிகள் இல்லையென்றால் இப்படியான ஆராதனை என்கிற Worship கிடையாது என்கிற அளவிற்கு Template ஒன்றை உருவாக்கி வைத்திருக்கிறார்கள்.

சாவு வீட்டிலும் கூட G Major / D Minor இல்லையென்றால் பாடவியலாது என்கிறார்கள். கூடவே, இதனை நடத்துபவர் சொல்வது போன்று கைகளைத் தூக்கவும், நடன அசைவுகள் செய்யவும் மக்கள் நிர்ப்பந்திக்கப்படுவார்கள் என்பது அடுத்த மூடத்தனம்.

கிறிஸ்தவத்தின் அடிப்படையே அன்பும், ஒருவருக்கு ஒருவர் உதவி செய்தலும், மக்களைச் சந்தித்தலும், பிறர் தேவைகளை நிறைவேற்றுதலும் தான். ஆனால், சமகாலத்தில் இவை நிகழ்வதில்லை; பகட்டும், இசைக்கருவிகள் வழியே தங்களை மட்டுமே முன்னிறுத்துவதும், Worship என்பதன் பெயரில் மக்களை Trance எனப்படுகின்ற பரவச நிலையில் வைத்திருப்பதும், கன்வென்சன் என்பதன் பெயர்களில் கூடுகைகள் நடத்தி பொருள் ஈட்டலும் தான் கிறிஸ்தவம் என்கிற அளவில் தான் சமகால கிறிஸ்தவர்கள் தொடர்கிறார்கள்.

இன்னமும் இஸ்ரவேலின் தேவன் என துதிகள் செய்யும் கிறிஸ்தவர்கள் எவரும் பாலஸ்தீனிலும், லெபனானிலும் இஸ்ரேல் நிகழ்த்தும் இன அழிப்பைக் குறித்து வாய் திறப்பதில்லை. 

Worship @ ஆராதனை எனும் போலித்தனம் மனித வாழ்வியலுக்கு எவ்வித நன்மைகளையும் பயத்தல் சாத்தியமில்லை. மக்களின் தேவைகளை சந்திக்காத, மக்களின் பிரச்சனைகளைப் பேசாத கிறிஸ்தவ நம்பிக்கை வெள்ளையைடிக்கப்பட்ட கல்லறைக்கு சமானம்.

நேகா போரா எனும் போராளி

போராளிகள் எல்லா காலத்தும் வியப்படையச் செய்கிறார்கள். அதிலும் பெண் போராளிகள் சற்று அதிகமாகவே வியப்பில் ஆழ்த்துகிறார்கள். இப்படியான மனத்திண்மை கொண்ட பெண்களை இதுவரை சந்திக்காததும், எம் நிலப்பரப்பில் இப்படியான பெண் ஆளுமைகள் இல்லாததும் ஒரு வகையில் என் வியப்பிற்கு காரணம் எனலாம். 

நேகா போரா (Neha Bora) வயது 29.
அகில இந்திய  மாணவர் சங்கத்தின் தலைவர்,
டெல்லி ஜவஹர்லால் நேரு பல்கலைக்கழகத்தில் ஆராய்ச்சி மாணவர்,
நாடகக்கலைஞர்
என்கிற முகங்களுக்கு சொந்தக்காரர். உத்தராகண்ட் மாநிலத்தைச் சார்ந்த நேகா அவர்கள் அரசுத் தேர்வு முறைகேடுகளுக்கு எதிரான போராட்டத்தில் மிகப்பெரும் பங்காற்றியிருக்கிறார்.

ஒரு போராளிக்குத் தேவையான முதல் சிறப்புப் பண்பு துணிவு தான். அதனை எல்லோராலும் சாத்தியப்படுத்தி விட முடியாது. நேகா எப்போதும் பெரும் துணிச்சலுடன் களத்தில் நிற்கிறார். கூடவே, அவரது செறிவு மிக்க பேச்சின் வழியாக அவரது ஆழ்ந்த வாசிப்பும், தெளிவும், உறுதியும் நமக்கு புலப்படுகிறது. நேற்று கரன் தாப்பர் அவர்களுக்கு அளித்த பட்டாசான பேட்டி அதை வெகுவாக உறுதிப்படுத்துகிறது. ( https://youtu.be/ZY2mmqFWT4k?is=qSI0OM0Rhs9m0eRI )

மாணவர் நலன்களுக்காக, விளிம்பு நிலையில் இருக்கும் மாணவர்களின் எதிர்காலத்திற்காக, நலிவடைந்த சமூகத்தில் உள்ளவர்களுக்காக 23 நாட்கள் தொடர் உண்ணாவிரதம் இருப்பதெல்லாம் நம்மால் நினைத்து கூட பார்க்க முடியாதது. நேகாவுடன் அவரது மாணவர் சங்க சகாக்களான மனிஷ் குமார் மற்றும் அமீன் அமிட்டோஜ் ஆகியோர்  உண்ணாவிரதம் இருந்ததையும் இங்கு குறிப்பிட்டாக வேண்டும். 

நமக்கு சாவித்திரிபாய் பூலே அவர்களையோ, பாத்திமா ஷேக் அவர்களையோ நேரில் பார்க்கும் வாய்ப்பு கிடைக்கவில்லை; அவர்களது காத்திரமான பேச்சுகளையும் கேட்கும் வாய்ப்பு அமையவில்லை; ஆனால், அவர்களை நேகாவின் உருவில் பார்க்கும் பெரும் வாய்ப்பு கிடைத்திருக்கிறது என நேகா அவர்களது தொடர்ச்சியான கள செயற்பாடுகளால் ஈர்க்கப்பட்ட ஒருவர் எழுதியிருந்தார். 

அதனுடன் நான் முழுமையாக உடன்படுகிறேன். 

நேகா போரா போன்றோர் எக்காலத்தும் தங்கள் நலனை விட இந்த சமூகத்தின் நலனை, எதிர்கால சந்ததியினரின் நலனை தொடர்ந்து முன் வைக்கிறார்கள்; அவர்கள் பெரும் போற்றுதலுக்கும், மரியாதைக்கும் உரியவர்கள். 

இதனால் தான் திருவள்ளுவர்…

"அன்பிலார் எல்லாம் தமக்குரியர் அன்புடையார் என்பும் உரியர் பிறர்க்கு"

என்று எழுதி வைத்தார் போலும்! 

Long live Neha
Long live the resistance 

✊🏼ஜெய் பீம்!

சிங்காரச் சென்னை எனும் தோற்றப்பிழை

 சிங்காரச் சென்னை என்பதெல்லாம் பெயரளவிற்குத்தான் என்பதை துறைமுகம் தொகுதிக்கு உட்பட்ட இடங்களில் பதிவு செய்யப்பட்ட இந்த ஒற்றைக் காணொளி சொல்லி விடுகிறது

இத்தனைக்கும் ஸ்டான்லி மருத்துவக் கல்லூரி, ராஜீவ் காந்தி பொது மருத்துவமனை, ஜார்ஜ் டவுன், பிராட்வே ஆகிய முக்கிய இடங்களை உள்ளடக்கிய சென்னையின் மையப்பகுதி தான் துறைமுகம் தொகுதி.

சுகாதாரமின்மை, வீடுகள் இல்லாமல் பொதுமக்கள் வீதிகளிலும், நடைமேடைகளிலும் தங்கும் நிலைமை. பெண்கள் பாதுகாப்பாக ஒதுங்குவதற்கு கூட போதிய வசதி இல்லாத நிலை என அத்தனை பிரச்சனைகளைத் தாங்கி நிற்கிறது இந்த பகுதி. ஈக்கள் மொய்க்கும் அந்த இடத்தைப் பார்க்கையில் தலையில் அடித்துக் கொண்டேன்.

இந்த தொகுதிக்கு உட்பட்ட - அரசியல் கட்சிகளும், கிறிஸ்தவர்கள் உள்ளிட்ட மதங்கள் சார்ந்த தொண்டு நிறுவனங்களும், தன்னார்வலர்களும் என்ன செய்கிறார்கள் என்று கேள்விகள் எழுந்தாலும் இதற்கு முழு பொறுப்பும் ஏற்க வேண்டியது அரசு தான். 

இந்த பகுதியை இத்தனை காலம் யார் ஆட்சி செய்தார்கள் இப்போது தெரிந்தெடுக்கப்பட்டிருக்கின்ற சட்டமன்ற உறுப்பினர் யார், சென்னையின் தற்போதைய மேயர் யார் என்பதெல்லாம் சொல்லித் தான் தெரிய வேண்டுமென்பது இல்லை. 

இப்படியானச் சூழலில் வாழும் மக்களுக்காக பரிதாபப்படும் அதே நேரம், சென்னையில் தடுக்கி விழும் இடங்களில் எல்லாம் சபைகளை, பிரார்த்தனைக் கூடங்களை உருவாக்கி பணம் ஈட்டும் கிறிஸ்தவ நிறுவனங்கள் எத்தனை இப்படியான மக்களை சென்று சந்தித்து அவர்களின் தேவைகளை நிறைவேற்றிக் கொடுக்கிறார்கள் என்கிற கேள்வியும் எழுகிறது. 

இதனாலேயே தான் ‘நான் ஓர் கிறிஸ்தவனாக சா*க மாட்டேன்’ எனத் தொடர்ந்து பேச வேண்டியிருக்கிறது. மக்களோடு மக்களாக நின்ற இயேசுவுக்கும் இன்றைய பணம் விழுங்கி போலி கிறிஸ்தவத்திற்கும் மிகப்பெரிய இடைவெளி இருக்கிறது. 

காலம் எல்லாவற்றையும் நம் முன் தெளிவாக நிறுத்தி வைத்திருக்கிறது. 

இதைப் பார்த்துவிட்டு மீண்டால் சிங்காரச் சென்னை 3.0 திட்டத்திற்கு முதல்வர் விஜய் ஒப்புதல் என செய்தி. வேடிக்கையாக இருக்கிறது. இந்த ஆட்சி எப்படியான சக்தி என்பதெல்லாம் இரண்டு ஆண்டுகளில் தெரிந்து விடும் 🚶🏽‍♂️

காணொளி - நீலம் சமூக அமைப்பு 

https://youtu.be/fcD3erwGTNg?is=lgZr1LYnmCvHgPGU 

தலித் கிறிஸ்தவர் - அரசியல் - எலைட் மனோநிலை

கிறிஸ்தவர்களாக தங்களை அடையாளப்படுத்திக் கொண்டிருப்போர் அதிலும் தலித் கிறிஸ்தவர்கள் பெரும்பாலானோர் தங்களுக்குள் ஒரு எலைட் மனோபாவத்தை கொண்டு நடப்பது விவாதத்திற்கு உரியது.

ஆண்ட பரம்பரை என தங்களைக் குறிப்பிடும் வகையினருக்கும் இவர்களுக்கும் பெரிய வேறுபாடு இல்லை. 

தங்களது எலைட் மனோபாவம் ஆபத்தானது; அது சமூக நீதி அரசியலுக்கு எதிரானது என்பதை இவர்கள் அறிந்திருக்கிறார்களா என்பது பெரும் கேள்விக்குறி!

“கிரேக்கனென்றும் இல்லை யூதனென்றும் இல்லை” எல்லாரும் கடவுள் முன்னால ஒண்ணு தான் அப்படின்னு பவுல் எழுதியிருந்தாலும், நீர் சொல்றத சொல்லும் நாங்க பின்னொட்டு வச்சி கிறிஸ்தவ ப*#ர், கிறிஸ்தவ சா#*, கிறிஸ்தவ வ*#%@ அப்படின்னு சாதியால் தான் அறியப்படுவோம் என பிரிவினை செய்பவர்கள் தான் So Called கிறிஸ்தவர்கள். 

(இதனாலேயே தான் தலித் கிறிஸ்தவர்கள் என்றும் குறிப்பிட்டு எழுத வேண்டி இருக்கிறது.)

தலித் கிறிஸ்தவர்களை மற்ற கிறிஸ்தவ சபையினர் புறந்தள்ளுவது காலங்காலமாக நடந்து வருகிற ஒன்று. (இந்த தலைமுறையினர்  ஓரளவு மாறியிருக்கின்றனர்)

இதில் இன்னும் முரண் நகை என்னவென்றால் ‘தலித் கிறிஸ்தவர்கள் இடையே கூட ஒற்றுமை கிடையாது.’

அது கூட பரவாயில்லை… NEET தேர்வு உள்ளிட்ட எந்த பொது நலன் சார்ந்த விசயத்திலும் தமிழர்களுக்குள்ளேயே அரசியல் கட்சிகள் துவங்கி , அரசியல் சாரா அமைப்புகள் வரை நமக்குள்ளேயே ஒருமித்த கருத்து கிடையாது.  

இஸ்ரேலியர்கள் - இஸ்ரேல் அல்லாதோர் ( புற ஜாதியினர்) என்கிற விவரணைக்கு இணையானது தான் தலித் - தலித் அல்லாதோர் என்கிற விவரணையும். 

இது கிறிஸ்தவத்தின் அடிப்படையிலேயே பிரிவினை இருக்கிறது என்பதைத்தான் காட்டுகிறது. அதே போன்ற பிரிவினை தமிழர்கள் இடையேயும் சாதி வடிவில் தொடர்கிறது.

சாதிய வேறுபாடு பார்க்காமல் ஐரோப்பிய கிறிஸ்தவர்கள் செய்து விட்டுப் போன  நற்செயல்கள் தொடராமல் போனதிலும்; ஒடுக்கப்பட்டோர் நலனிற்காக அவர்கள் செய்த சேவைகளை மறந்துவிட்டு தங்கள் சுய லாபத்திற்காக கிறிஸ்தவ தத்துவத்தை வியாபாரமாக்கியதிலும் தலித் கிறிஸ்தவர்களுக்கு பெரும்பங்கு உண்டு. 

இப்படி உள்ளடி வேலைகள் செய்து தங்கள் மேட்டிமைத்தனத்தை நிறுவி அதன் வழியாக பொருளீட்டும் தலித் கிறிஸ்தவர்கள், பெருநகரங்களில், கேள்விகளுக்கு உள்ளாகும் போது தங்களின் தலித்  அடையாளத்தையும் துறந்து விட தயாராக இருக்கிறார்கள்.

தலித் என தங்களை அடையாளப்படுத்துவதை அவர்கள் விரும்புவதில்லை. 

தங்களை தலித் என்கிற அடையாளத்தில் இருந்து விடுவித்துக் கொள்வதற்காக…

“நாங்க அந்த ஆளுங்க இல்ல”

“சே… சே… நாங்க SC இல்ல! நாங்க BC தான்” என்பார்கள். 

அதாவது தங்களை பிற சாதியினருக்கு ஒப்பாக காண்பிக்க இவர்கள் முன்வைக்கும் பொய்கள் இவை. 

‘தலித் என்றால் இழிவு’ என காலம் காலமாக சொல்லப்பட்டு வரும் விவரணைக்கு, தங்கள் நிஜ அடையாளங்களில் இருந்து தப்பிக்க முயலும் தலித்களின் இது போன்றதான சொல்லாடல்கள் மேலும் வலு சேர்க்கின்றன. 

இவற்றை கண்டும் காணாமல் இருந்து விட்டு, இடைநிலைச் சாதியினரை தூக்கிப் பிடிக்கும் அரசியல் கட்சிகளுக்கு கண்மூடித்தனமாக ஆதரவை அளிப்பதும், அவர்களது சாதிய ஒடுக்குமுறைகளை கண்டிக்காமலும் இருப்பது சமூக நீதி அரசியலில் நம்பிக்கையுடையவர்களுக்கு அழகல்ல. 

#தேர்தல்2026

#DalitChristians

திராவிட கட்சிகளின் அதிகார மமதை

 தேர்தல் - சமூக வலைதளம் - யதார்த்த வாழ்க்கை இவை இடையே மிகப்பெரும் இடைவெளி இருக்கிறது. அதை நம்மால் புரிந்து கொள்ள் முடியும் ஆனால் ஏற்றுக்கொள்வதில்லை. 

பணத்தினால் எதுவும் செய்து விடலாம் என கருதும் கட்சிகளும், மக்கள் அன்றாடம் சந்திக்கும் பிரச்னைகளை விவாதிக்காத சமூக வலைதள பதிவர்களும் / எழுத்தாளர்களும்/ ஊடகங்களும் அதன் போக்கிலேயே தொடர்கின்றன. 

இவை பெரும்பாலும் Like/ TRP / Votes இவற்றை மட்டுமே அடிப்படையாக கொண்டு இயங்குகின்றன. 

கன்னியாகுமரியின் இயற்கை வள அழிப்பு; கேரளாவில் இருந்து கன்னியாகுமரியில் கொண்டு கொட்டப்படும் கழிவுகள்; சிவகாசி, விருதுநகர் பட்டாசு ஆலைகளின் பாதுகாப்பை உறுதி செய்தல்; மாஞ்சோலை மக்களின் வாக்கு பறிப்பு… இவை முதலான இன்னும் பல நூறு பிரச்சனைகள் குறித்த விவாதங்கள் / தேர்தல் வாக்குறுதிகள் எதுவும் இந்த தேர்தலை ஒட்டி நிகழவில்லை. 

ஆனால் வாக்கை மட்டும் இன்னாருக்கு போடுங்கள், அன்னாருக்கு போடுங்கள் என உழப்பல் தொடர்ந்தது. 

கல்வியை அளித்து விட்டு கூடவே வாக்குக்கு காசையும், பொன்னையும், பொருளையும்  கொடுக்கிற கட்சிகள் சமூகத்தில் எப்படி மாற்றத்தைக் கொண்டு வரும். 

கிட்டத்தட்ட 60 ஆண்டுகள் திராவிட கட்சிகள் ஆட்சி செய்த பிறகும் சாதியினால் பிரிந்து கிடக்கிறோம், இளைஞர்களை அரசியல் படுத்தாமல் திரை மோகத்தில் வைத்திருக்கிறோம்; அவர்களை தற்குறிகள் என்றும் அழைக்கிறோம்,  நகரங்களை மேம்படுத்த பல ஆயிரம் கோடிகள் செலவழித்து விட்டு நம் முதுகெலும்பான கிராமங்களை தேய விட்டிருக்கிறோம். 

பொத்தாம் பொதுவாக சனாதனத்தின் மீது குற்றம் சுமத்தி விட்டு, இடைநிலை சாதியினர் தலித் மக்களின் மீது தொடர்ந்து நிகழ்த்தும் வன்முறைகளை ஒடுக்க தவறிய திராவிட கட்சிகள் இருந்தென்ன பயன். இவர்களுடன் தொடர்ந்து பயணிக்கும் தலித் தலைவர்களும் வாயை மூடிக்கொண்டு இருப்பது தான் பேரபத்தம். 

முதல்வரும், துணை முதல்வரும்  இன்று வரை வேங்கைவயலில் கால் வைக்கவில்லை. மக்கள் அங்கு தேர்தல் புறக்கணிப்பு செய்திருக்கிறார்கள். 
இவர்கள் இப்படியாக மக்களை பிளவுபடுத்தி வைத்துக் கொண்டு அரசியல் நடத்துவது வெறும் வாக்குகளுக்காகவும் அதன் வழியாக பெறும் அதிகாரத்திற்கும் தான் என்பது தான் உண்மை. 

அதனை திராவிட கட்சிகளுக்கு கொடி பிடிப்போர் அறிந்திருந்தாலும் ஏற்றுக்கொள்வதில்லை, ஏனென்றால் பெரும்பான்மையின் பக்கம் நின்று ஒத்து ஊதுவதைத்தான் அவர்களும் விரும்புகிறார்கள். 
#தேர்தல்2026