பெங்களூருவின் ட்ராஃபிக் கொடுமை

பூங்கா நகரம் என்றழைக்கப்படும் பெங்களூரு நேற்று மாலை 5 மணி நேரம் நகரவியலாமல் ஸ்தம்பித்திருக்கிறது.காரணம் வேறு ஒன்றுமில்லை முன்னாள் பிரதம மந்திரி தேவேகவுடாவின் ஜனதா தள கட்சியினர் பேலஸ் மைதானத்தில் நிகழ்த்திய பொதுக்கூட்டமும் அதனையொட்டி நடந்த பேரணியும் தான்.

கொஞ்சம் நினைத்துப் பாருங்கள் ஒன்றல்ல இரண்டல்ல ஐந்து மணி நேரம் (300 நிமிடங்கள்) போக்குவரத்து நெரிசலில் சிக்கினால் எப்படியிருக்குமென்று.மதியம் மூன்று மணிக்கு பள்ளி முடிந்த சிறு குழந்தைகள் இரவு 8 மணிக்கு மேலாகவே வீடு திரும்பியிருக்கிறார்கள்.ஐந்து மணி நேரம் வாகத்தினுள்ளேயே அடைபட்டிருக்கிறார்கள்.

தண்ணீர், உணவு இல்லாமல்;கழிப்பிடம் செல்ல கூடவியலாமல் தவித்த காட்சிகள் மிகக் கொடுமை. குழந்தைகள் மட்டுமல்லாது மருத்துவமனைகளுக்கு சென்று சிகிச்சை பெறவியலாமல் சிலர், விமானத்தை,பேருந்தை,ரயிலை பிடிக்கவியலாமல் சிலர், இரவு பணிகளுக்கு செல்லவியலாமல் சிலர் இப்படி ஒவ்வொருவரும் பெரும் அவதிபட்டுள்ளனர் இந்த அரசியல் பேரணியால்.

இது இன்று நேற்றல்ல வெகு நாட்களாகவே நடந்து வரும் கொடுமை.போக்குவரத்து நெரிசலை தவிர்க்க தொடங்கப்பட்ட மெட்ரோ ரயில் திட்டம் இன்னும் முடிந்த பாடில்லை.இதனிடையில் இவர்கள் பேரணிகளுக்கு ஒன்றும் குறைச்சலில்லை ஈராண்டுகளுக்கு முன்னர் நானும் ஒருமுறை இவர்களின் பேரணி ஒன்றால் போக்குவரத்து நெரிசலில் இதை விட சற்றே குறைவான நேரம் தான் (மூன்று மணி நேரம்) சிறைபிடிக்கப்பட்டேன்(என்ன கொடும சார்).

சாதாரணமாகவே பெங்களூரு நகரம் போக்குவரத்து நெரிசலுக்கு உலகப் புகழ் வாய்ந்தது.குறிப்பாக போக்குவரத்து அதிகம் இல்லாத நேரங்களில் 10 நிமிடங்களில் கடக்கக் கூடிய ஓசூர் சாலையை பணி நேரங்களில் கடக்க வேண்டுமானால் குறைந்தது ஒரு மணி நேரமாவது தேவைப்படும். (உலகிலேயே மிக அதிக இரு சக்கர வாகனங்கள் பெங்களூரு நகரத்தில் தான் ஓடுகின்றன)

தேவேகவுடாவை பேரணி மூலம் மக்களுக்கு ஏற்பட்ட இடையூறைக் குறித்து பத்திரிக்கை ஒன்று கேட்கையில் இதெல்லாம் நடக்கின்ற ஒன்று தான் பெரிதாக கூற ஒன்றுமில்லை என்று மிக சாதாரணமாக பதிலளித்திருக்கிறார்.

மக்கள் பணத்திலேயே வாழ்ந்து கொண்டிருந்தும் மக்களைக் குறித்துக் கவலைப் படாத இவரை எல்லாம் என்ன செய்வது? ஒருமுறை பிரதமராகக் கொண்டதற்கு வெட்கித் தலை குனிவதைத் தவிர!

சர்வதேச கிரிக்கெட் கவுன்சில் இந்தியாவிடம் பிச்சை எடுக்கிறதா?

இந்திய கிரிக்கெட் வாரியம் இங்கிலாந்து அணியிடம் டிசம்பர் 11 ஆம் தியதி ஆரம்பிக்கவிருக்கும் முதலாவது டெஸ்ட் போட்டியை ஒரு நாள் தள்ளி வைக்குமாறு கேட்டுக் கொண்டிருக்கிறது என்று இங்கிலாந்து அணியின் செய்தி தொடர்பாளர் ஆன்ட்ரூ வால்போல் பி.டி.ஐ கு அளித்த பேட்டியில் தெரிவித்திருக்கிறார்.காரணம் என்னவென்றால் டிசம்பர் 10 அன்று நடக்கவிருக்கும் ஐ.பி.எல் சாம்பியன்ஸ் லீக்கின் இறுதிப் போட்டியில் தோனி விளையாடி விட்டு ஒரு நாள் ஓய்வு வேண்டுமென்பதால்.

சர்வதேச போட்டிகள் அனைத்தும் சர்வதேச கிரிக்கெட் கவுன்சிலால் இரு நாட்டு ஒப்புதலுடன் தீர்மானிக்கப்படுகின்றன.இந்த நிலையில் இந்திய கிரிக்கெட் வாரியம் இப்படி பிச்சை எடுப்பது ஏனோ தெரியவில்லை?

ஐ.பி.எல் போட்டிகள் இன்னும் ஆரம்பிக்கவே இல்லை அதன் முன்னதாகவே இறுதிப் போட்டியில் தோனி விளையாடுவதைப் பற்றி பேசுகிறார்கள் இவர்கள்.என்ன பந்தயம் இப்போதே முடிவு செய்யப்பட்டுவிட்டதா?(மேட்ச் ஃபிக்சிங்கா?) இல்லை சென்னை சூப்பர் கிங்ஸ் இறுதிப் போட்டிக்கு தகுதி பெறும் என்ற குருட்டு நம்பிக்கையா?

இல்லையென்றால் சர்வதேச கிரிக்கெட் கவுன்சில் இந்தியாவில் தான் இயங்குகிறதா?

சர்வதேச கிரிக்கெட் கவுன்சில் இதனை அனுமதிக்கும் பட்சத்தில் பிற நாடுகள் குறிப்பாக பாகிஸ்தான் கேள்விகள் கேட்கக் கூடும் ஏன் சாம்பியன்ஸ் டிராபியை மாற்றி வைத்தார்கள் என?

அப்படியே சர்வதேச கிரிக்கெட் கவுன்சில் அனுமதித்து பிற நாடுகளும் கேள்வி கேட்கவில்லையென்றால் சர்வதேச கிரிக்கெட் கவுன்சிலும் பிற கிரிக்கெட் வாரியங்களும் இந்திய கிரிக்கெட் நடத்தும் ஐ.பி.எல் இடும் பிச்சைக்காக கையேந்துகிறார்கள் இல்லையென்றால் இந்திய கிரிக்கெட் வாரிய வாசலில் தவமிருக்கிறார்கள் என்றே கருதப்படும்.

ஓரினச் சேர்க்கையாளர் எல்டன் ஜானும் அவரின் சாதனைகளும்

ஓரின சேர்க்கையாளரான இங்கிலாந்தின் சர்.எல்டன் ஜானின் பாடல் அமெரிக்காவில் இதுவரை 11 மில்லியன் பதிவுகளுக்கும் அதிகமாக விற்று சாதனை படைத்துள்ளது.இங்கிலாந்து (வேல்ஸ்) இளவரசி டயானா ஸ்பென்சரின் இறுதிமரியாதை சடங்கில் சர் எல்டன் ஜான் பாடிய Candle in the wind என்ற பாடல் தான் அது.இத்தனைக்கும் 5மில்லியன் பதிவுகள் தான் இங்கிலாந்தில் விற்றது.

அமெரிக்காவில் இது வரை வேறு எந்த பாடலும் இத்தனை பதிவுகள் விற்பனை ஆனது இல்லை.சர்வதேச அளவில் 33 மில்லியன் பதிவுகள் இதுவரை விற்றுத் தீர்ந்துள்ளன(நானும் ஒரு பதிவு வைத்துள்ளேன்) அவற்றில் 55 மில்லியன் பவுண்ட் தொகையை டயானா நினைவு நிதிக்காக வழங்கியிருக்கிறார் எல்டன்.எல்டனின் நெருங்கிய நண்பராவார் இளவரசி டயானா.(1973 ல் எல்டனின் நண்பர் Taupin எழுதி எல்டன் இசையமைத்த Candle in the wind பாடலின் வரிகளை டயானாவிற்காக மாற்றி எழுதினார் Taupin.மர்லின் மன்றோவிற்காக எழுதியது தான் 1973 ன் Candle in the wind ) 1997 ஆம் ஆண்டு டயானாவின் இறுதி சடங்கை நேரலையில் பார்த்துக் கொண்டிருந்த எவரும் அத்தனை எளிதில் மறந்திருக்க முடியாது அந்த பாடலை.அதன் பின்னர் அந்த அற்புதமான வரிகளை எல்டன் இதுவரை எந்த நிகழ்ச்சியிலும் பாடவில்லை.அவரைக் கேட்டால் அந்த வரிகள் அத்தனைச் சிறப்பு வாய்ந்த என் நண்பிக்காக மட்டுமே பாட முடியும் அதுவும் அந்த ஒரு முறை தான் என்று கண் கலங்குகிறார்.

சர்.எல்டன் ஜான் எப்போதும் பியானோ வாசித்துக் கொண்டு பாடுவது தான் வழக்கம்.அதைப் போன்றே வெஸ்ட் மினிஸ்டர் அபே என அழைக்கப்படும் இங்கிலாந்தின் புகழ்பெற்ற ஆலயத்தில் நடந்த இறுதிச் சடங்கிலும் பாடினார். இந்த ஆலயத்தில் தான் இளவரசர் சார்லஸ்-டயானா திருமணமும் நடந்தது குறிப்பிடத்தக்கது.

Someone saved my life tonight,sacrifice, Can you feel the love tonight, Believe,Your song போன்றவை இவரது பாடல்களில் அதிகம் பிரசித்தி பெற்றவை.

அமெரிக்காவில் இசைக்காக வழங்கப்படும் உயரிய விருதான கிராமியை இதுவரை ஐந்து முறை வென்றிருக்கிறார்.இங்கிலாந்து கால்பந்து அணிக்காகவும் பாடல்கள் பாடியிருக்கும் இவர் இவரது சிறுவயது ஆசையான watford கால்பந்து கிளப்பின் இயக்குனராகவும் இருந்திருக்கிறார்.

1976 களிலேயே தான் ஈரினசேர்க்கையாளன் என பகிரங்கமாக ஒப்புக்கொண்டார்.என்றாலும் அதன் பின்னர் ஓரினச் சேர்க்கையாளராக(Gay) இருக்கிறார்.

1980 களில் இருந்து எய்ட்ஸ் நோய் விழிப்புணர்வு பணிகளிலும் ஈடுபட்டு வருகிறார்.1990 ல் காதல் தோல்வியினாலும் பிற பிரச்சினைகளினாலும் குடி மற்றும் போதைபொருட்கள் உபயோகித்து பின்னர் அதிலிருந்து விடுபட சிக்காகோ மருத்துவமனையில் சிகிச்சை பெற்றார்.

1992 ல் எய்ட்ஸ் அறக்கட்டளை ஒன்றை ஆரம்பித்து எய்ட்ஸினால் பாதிக்கப்பட்டவர்களுக்கும் எய்ட்ஸ் தடுப்புக் கல்விக்கும் உதவி வருகிறார்.அவருக்கு குழந்தைகள் ஏதுமில்லையென்றாலும் பத்து குழந்தைகளை தத்து எடுத்திருக்கிறார்.

1998 ல் சர் என்ற பட்டமளிக்கப்பட்டு கௌரவிக்கப்பட்டுள்ளார்.

2006 ல் சமயங்களை/மதங்களை தான் வெறுப்பதாகவும், சமயம் என்பதே உலகில் தேவையில்லை அவை மனிதனை அழிக்கின்றனவே ஒழிய அன்பைக் காட்டுவதில்லை என்று சாடியிருக்கிறார்.

பில்போர்ட் பத்திரிக்கை சமீபத்தில் வெளியிட்ட 100 சிறந்த பாடகர்களில் எல்டன் ஜானுக்கு மூன்றாவது இடம்.பாப் பாடல்களின் ராணி மடோனா முதலிடத்திலும்.உலக புகழ்பெற்ற பீட்டில்ஸ் (Beatles) இரண்டாவது இடத்திலும் உள்ளனர்.

ஓரினச் சேர்க்கையாளரானால் என்ன ஈரினச் சேர்க்கையாளரானால் என்ன? திறமை இருந்தால் எங்குமே மதிப்பு தான் என்பது இவரது சாதனையிலிருந்து தெரிகிறது.

மேலும் மக்களுக்கு குறிப்பாக எய்ட்ஸினால் பாதிக்கப்பட்டோருக்கு உதவும் மனப்பான்மை இவரைப் போன்று சிலருக்கே வரும் என்பது ஆச்சரியம் கலந்த உண்மை. டிசம்பர் 1 உலக எய்ட்ஸ் விழிப்புணர்வு தினமாக அனுசரிக்கப்பட்டு வருகிறது.அன்று இவரைப் போன்றோரைப் பாராட்டுதலும் தகும்.

நன்றி மற்றும் தகவல் ஆதாரம்

1.Yahoo

2.wikipedia

"Candle in the wind"பாடல் இங்கே அதன் கீழே பாடல் youtube வீடியோவாக.(நானே வீடியோவாக்கியது)

"Candle in the wind" - 1997

Goodbye England's rose
May you ever grow in our hearts
You were the grace that placed itself
Where lives were torn apart
You called out to our country
And you whispered to those in pain
Now you belong to heaven
And the stars spell out your name

And it seems to me you lived your life
Like a candle in the wind
Never fading with the sunset
When the rain set in
And your footsteps will always fall here
Along England's greenest hills
Your candle's burned out long before
Your legend ever will

Loveliness we've lost
These empty days without your smile
This torch we'll always carry
For our nation's golden child
And even though we try
The truth brings us to tears
All our words cannot express
The joy you brought us through the years

Goodbye England's rose
May you ever grow in our hearts
You were the grace that placed itself
Where lives were torn apart
Goodbye England's rose
From a country lost without your soul
Who'll miss the wings of your compassion
More than you'll ever know

கிரிக்கெட் மேனியா இந்தியாவில் ஒரு கோல்ஃப் சாம்பியன்

36 வயதாகும்ஜீவ் மில்கா சிங் சிங்கப்பூரில் நடைபெற்ற கோல்ஃப் போட்டியில் சாம்பியன் பட்டம் வென்று சாதனை படைத்து இருக்கிறார்.இந்த போட்டியில் உலகதரவரிசையில் மூன்றாவது இருக்கும் ஃபில் மிக்கெல்சனும்,ஐந்தாவது இடத்திலிருக்கும் ஹாரிங்க்டனும் கலந்துகொண்டிருந்தார்கள்.ஆனால் மில்கா சிங் முதல் இருபது இடங்களில் கூட இல்லை என்பது ஆச்சரியத்திற்குரியது.

இதன் மூலம் அதிக அளவு பரிசுப்பணம் பெற்ற முதல் ஆசிய கோல்ஃப் வீரர் என்ற புகழையும் ஈட்டி உள்ளார்.இன்று மட்டும் 792,500 அமெரிக்க டாலர்கள் பரிசுப்பணமாகக் கிடைத்துள்ளது அவருக்கு.இந்த வருடத்தில் அவர் பெற்றிருக்கும் ஆறாவதும் மொத்த கோல்ஃப் வாழ்க்கையில் ஜீவ் மில்கா சிங் பெற்றிருக்கும் 16 ஆவது சர்வதேச சாம்பியன் பட்டமும் இதுவாகும்.

இதன் மூலம் ஆசியாவில் மிகச்சிறந்த கோல்ஃப் வீரர் என்ற பெருமையையும் பெற்றுள்ளார்.

இவர் ஒலிம்பிக் போட்டிகளில் ஓட்டப்பந்தயத்தில் பங்குபெற்ற திரு.மில்கா சிங்கின் புதல்வர் என்பது குறிப்பிடத்தக்கது.

2006 ல் பல வெற்றிகளைக் குவித்து பெருமை சேர்த்ததற்காக 2007 ல் பத்மஷ்ரீ விருது வழங்கி இந்திய அரசு இவரை கௌவரவப்படுத்தியுள்ளது.

கிரிக்கெட்டிற்கு அதிக முக்கியத்துவம் கொடுக்கப்படும் நம் நாடு இந்தியாவில் ஜீவ் மில்கா சிங் போன்ற வீரர்களையும் பிற விளையாட்டு வீரர்களையும் அரசு இன்னும் ஊக்குவித்தால் அவர்கள் மேலும் பல வெற்றிகளை குவிக்கவியலும்.

கடந்த வாரத்தில் தான் சைனா நேவால் பேட்மிண்டனில் ஜூனியர் உலகச் சாம்பியன் பட்டம் வென்று இந்தியாவுக்கு பெருமை சேர்த்தார்.அதன் முன் அக்டோபரில் தமிழர் விஸ்வநாதன் செஸ்ஸில் மூன்றாவது முறையாக உலகச் சாம்பியன் பட்டம் பெற்று இந்தியாவிற்கு சிறப்பை பெற்றுத் தந்தார்.அதன் சிலமாதங்கள் முன் பிந்த்ரா ஒலிம்பிக் துப்பாக்கிச் சுடுதலில் தங்கப்பதக்கம் பெற்றுத் தந்ததையும் எங்ஙனம் மறக்கவியலும்?

கிரிக்கெட் மற்றும் குழு போட்டிகளில் மட்டுமல்லாது தனிவீரர் போட்டிகளிலும் வெற்றிகள் பெற்றுவருவது இந்தியருக்கு மகிழ்ச்சியே!பெருமையே!

சச்சின் டெண்டுல்கரின் 19 ஆண்டு கால கிரிக்கெட் பயணம்

இந்தியக் கிரிக்கெட்டில் இன்றோடு 19 வருடம் நிறைவு செய்யும் சச்சினின் கடந்த காலங்களைப் பற்றிய ஒரு பார்வை.

24 ஏப்ரல் 1973 ல் பிறந்த வலக்கை ஆட்டக்காரர் சச்சின் ரமேஷ் டெண்டுல்கர் பள்ளிப்பருவங்களிலே சச்சினின் குரு மற்றும் ஆரம்பகால பயிற்சியாளர் ரமாக்கந்த் அச்ரேக்கர் அவரின் கீழ் கிரிக்கெட் வாழ்வைத் துவக்கினார். எம்.ஆர்.எஃப் அகடமியில் ஆஸ்திரேலியர் திரு.டென்னிஸ் லில்லியின் கீழ் வேகப் பந்துவீச்சாளராக பயிற்சி பெற அனுப்பப்பட்டார்.அங்கு அவர் மட்டை வீச்சில் மட்டுமே அதிக கவனம் செலுத்துவதாக லில்லியால் குறை கூறப்பட்டார்.

பள்ளிப்பருவத்திலே அச்ரேக்கர் ஒரு ரூபாய் நாணயத்தை விக்கெட் மீது வைத்து விடுவாராம்,சச்சினின் விக்கெட்டை எடுப்பவர்களுக்கு அந்த நாணயம் வழங்கப்படும் என்று பந்தயம் வைத்திருக்கிறார்.இல்லையென்றால் அந்த நாணயம் சச்சினுக்கு சொந்தம்.அப்படியாக 13 நாணயங்களை பெற்ற சச்சின் இன்றும் கூட பொக்கிஷமாக வைத்திருக்கிறார்.

1988 களில் சச்சினின் ஆட்டம் அனைவரையும் ஆச்சரியப்படுத்தும் வகையில் இருந்தது.1988 ல் அவர் ஆடிய அனைத்து போட்டிகளிலும் சதமடித்தார்.அந்த வருடத்தில் தான் 2006 ஆம் வருடம் வரை தகர்க்கப்படாமலிருந்த உலகத்திலே ஒரு விக்கெட்டிற்கு எடுத்த அதிகபட்ச ரன்னான 664* ஐ வினோத் காம்ளியுடன் சச்சின் எடுத்தார்,பள்ளிகளுக்கிடையே நடைபெற்ற லார்ட் ஹாரிஸ் பட்டயத்திற்கான போட்டி அது.326 ரன்கள் குவித்து இறுதிவரை ஆட்டமிழக்காமல் இருந்தார்.

14 வயதுடன் தனது முதல் தரக் கிரிக்கெட்டை சச்சின் தொடங்கிய போது திரு.சுனில்கவாஸ்கர் அவர்கள் இரண்டு மென்மையான கால் கவசத்தை (Pad) அளித்திருக்கிறார்.அது தான் நான் நன்றாக விளையாட தனக்கு மிகுந்த ஊக்கமளித்ததாக 20 ஆண்டுகளுக்கு பின்னர் உலக வரலாற்றில் அதிக சதமாகிய கவாஸ்கரின் 34 சதத்தை முறியடித்த போது கூறி கவாஸ்கருக்கு மரியாதை செலுத்தியிருக்கிறார்.

1988 டிசம்பர் 11ல் 15 வயது 232 நாட்களாகிய சச்சின் தனது முதல் தர கிரிக்கெட்டின் முதல் ஆட்டத்திலேயே மும்பைக்காக குஜராத்திற்கு எதிராக ஆட்டமிழக்காமல் சதமடித்து மிக இள வயதிலேயே சதமடித்தவர் என்ற புகழைப் பெற்றார்.

இந்திய கிரிக்கெட் வரலாற்றில் தான் ஆடிய மூன்று(ரஞ்சி, துலீப், இரானி) அறிமுகப் போட்டிகளிலும் சதமடித்த பெருமையையும் பெற்றுள்ளார்.

என்றாலும் சச்சினின் சர்வதேச அறிமுக ஆட்டங்களிலும் ஆரம்ப காலங்களிலும் சொல்லும்படியான பங்களிப்பு இல்லை.16 வயதில் 15 நவம்பர்,1989 ஆம் ஆண்டு கராச்சியில் பாகிஸ்தானுக்கு எதிராக,கிரிஸ் ஷ்ரீக்காந்த் தலைமையின் கீழ் டெஸ்ட் போட்டியில் அறிமுகமானார்.முதல் இன்னிங்க்சில் 15 ஓட்டங்கள் மட்டுமே பெற்றார்.ஆனாலும் பாகிஸ்தானின் அதிவேகப் பந்து வீச்சை சமாளித்ததே மிகப் பெரிய விஷயம் என கிரிக்கெட் வல்லுனர்கள் இன்றும் கூறுகின்றனர்.ஏனென்றால் வக்கார் வீசிய ஒரு பந்து சச்சினின் தாடையைப் பதம் பார்த்தது;அதன் பின்னரும் இரத்தக் கறைபடிந்த சட்டையுடன் சச்சின் தொடர்ந்து ஆடியது தான்.

அதே ஆண்டு டிசம்பர் 18 ல் சர்வதேச ஒரு நாள் போட்டிகளில் தனது கால் தடம் பதித்தார்.முதல் ஆட்டத்தில் ரன் ஏதும் எடுக்காமல் வெளியேறினார். டெஸ்ட் மற்றும் ஒரு நாள் போட்டிகளின் அறிமுக ஆட்டங்களில் சச்சினின் விக்கெட்டைச் சாய்த்தவர் வக்கார் யூனிஸ்.வக்காருக்கும் அது அறிமுக ஆட்டங்கள் தான் என்பது சுவாரஸ்யம்.

17 ஆவது வயதில் 1990 ஆம் ஆண்டு தனது முதல் டெஸ்ட் சதத்தை சச்சின் இங்கிலாந்து அணிக்கு எதிராக ஓல்ட் ட்ரஃபோர்டில் எடுத்தார்.அதன் பின்னர் தனக்கு 25 வயது ஆகுமுன் 16 சதங்கள் அடித்தார்.2000 ல் உலக கிரிக்கெட் வரலாற்றில் 50 சதங்களுக்கு மேல்(டெஸ்ட் மற்றும் ஒருநாள் போட்டிகள் இணைந்து) எடுத்த முதல் வீரர் என்ற புகழைப் பெற்றார்.

1991-1992 ஆஸ்திரேலிய சுற்றுப்பயணத்தின் போது சிட்னியில்(ஷேன் வார்னின் முதல் போட்டி) சச்சின் ஆட்டமிழக்காமல் குவித்த 148 ஓட்டங்கள் மற்றும் பெர்த் வாக்கா மைதானத்தில் அடித்த சதமும் தான் இன்று வரை அவரடித்த சதங்களில் முதலிடம் பெறுகிறது.ஏனென்றால் பெர்த் மைதான ஆடுதளம் வேகப்பந்து வீச்சாளர்களுக்கு மிக சாதகமானது.

அன்றே ஆஸ்திரேலியாவின் மெர்வ் ஹூஜ்ஸ் ஆலன் பார்டரிடம் இந்த பொடியன் உன்னை விட அதிக ஓட்டங்கள் குவிப்பான் என்று கூறியிருக்கிறார்.

உலகின் தலை சிறந்த மட்டையாளரும் ஆஸ்திரேலியருமான சர்.டான் பிராட்மேனே சச்சினின் ஆட்டம் அவரது ஆட்டத்தைப் போன்றே இருப்பதாக சச்சினைப் புகழ்ந்திருக்கிறார்.பிராட்மேனின் மனைவியாகிய ஜெசியும் அதை ஒப்புக் கொண்டுள்ளார்.

ஆஸ்திரேலியர் ஷேன் வார்ன் தனது புத்தகத்தில் உலகின் தலை சிறந்த வீரர்களின் பட்டியலில் சச்சினுக்கு முதலிடம் கொடுத்து கவுரவித்துள்ளார்.

1994 செப்டம்பர் 9 ல் ஒரு நாள் சர்வதேச போட்டியின் முதல் சதத்தை ஆஸ்திரேலியாவுக்கு எதிராக இலங்கையில் நிறைவு செய்தார்.

1996 உலகக் கோப்பைப் போட்டிகளில் அதிக ஓட்டங்கள்(523) குவித்த வீரர் என்ற பெருமையைப் பெற்றார்.கொல்கொத்தா ஈடன் கார்டன் அரை இறுதியில் சச்சின் வெளியேறியதும் ஒருவர் பின் ஒருவர் பரிதாபமாக ஆட்டமிழந்த நேரத்தில் ரசிகர்கள் கலவரத்தில் ஈடுபட இந்தியா இலங்கையுடன் தோல்வியடைந்ததாக அறிவிக்கப்பட்டது.65 ரன்கள் குவித்தார் சச்சின் அரையிறுதியில்.

1998 ல் ஆஸ்திரேலிய அணி இந்தியாவில் சுற்றுப்பயணம் செய்து ஆடிய டெஸ்ட் தொடரில் வரிசையாக மூன்று சதங்கள் அடித்து வெற்றி வாகை பெற்றுத் தந்தார்.அதே வருடம் சார்ஜாவில் நடைபெற்ற கோகோ-கோலா முத்தரப்பு ஒருநாள் கிரிக்கெட் தொடரில் அடுத்தடுத்த போட்டிகளில் ஆஸ்திரேலியாவிற்கு எதிராக இரண்டு சதங்களை அடித்து கோப்பையை தனி ஒருவராக பெற்றுத் தந்தார்.

1999ல் சென்னை சேப்பாக்கத்தில் நடைபெற்ற பாகிஸ்தானுக்கு எதிரான டெஸ்ட் போட்டியில் முதுகில் வலியையும் வைத்துக் கொண்டு அவர் குவித்த 136 ஓட்டங்கள் இன்றும் மறக்கவியலாதது.அப்போட்டியில் கடைசி நான்கு விக்கெட்டுகள் ஒற்றை இலக்க ஓட்டங்களில் வெளியேற இந்தியா தோல்வியடைந்தது.அந்த தோல்விக்காக இன்றும் வருத்தப்படுகிறார் சச்சின்.

1999 உலகக் கோப்பைப் போட்டிகளின் நடுவே தந்தையை இழந்த சச்சின் அவருக்கு இறுதி மரியாதை செலுத்தும் வண்ணம் ஜிம்பாப்வே அணியுடனான ஒரு போட்டியை விட்டுக் கொடுத்து இந்தியா வர வேண்டியிருந்தது.பின்னர் மீண்டும் அணியில் திரும்பி கென்யாவிற்கு எதிராக 141* குவித்தார்.அந்த சதத்தை தனது தந்தைக்கு அர்ப்பணிப்பதாகக் கூறி கண்ணீர் மல்கினார்.கிரிக்கெட் மீது அத்தனை ஈடுபாடு உள்ளவர் தான் சச்சின்.

2003 உலகக் கோப்பைப் போட்டிகளின் 11 ஆட்டங்களிலிருந்து 673 ஓட்டங்களைக் குவித்து இந்தியா இறுதிப் போட்டிக்கு தகுதி பெற காரணகர்த்தாவானார்.இறுதிப் போட்டியில் இந்தியா தோல்வியடைந்தாலும் சச்சின் தொடர் நாயகன் விருது வழங்கி கவுரவிக்கப்பட்டார்.

2005, டிசம்பர் 10 அன்று திரு.கவாஸ்கரின் 34 டெஸ்ட் சதங்களை இலங்கைக்கு எதிராக முறியடித்தார்.

2007-2008 ல் ஆஸ்திரேலியாவிற்கு எதிரான காமன்வெல்த் பேங்க் தொடரில் தொடர்ச்சியாக இரு சதங்கள் அடித்து தொடர் வெற்றிக்கு வழி செய்தார்.

2008 அக்டோபர்17ல் உலகில் மேற்கு இந்திய தீவு ஆட்டக்காரர் லாராவின் சாதனையை முறியடித்து அதிக டெஸ்ட் ஓட்டங்கள் 12273 (நவம்பர் 10, 2008 ன் படி) எடுத்தவர் என்ற பெருமையைப் பெற்றுள்ளார் .டெஸ்ட் போட்டிகளின் வரலாற்றில் இதுவரை மொத்தம் 40 சதங்கள் எடுத்து முதலிடத்திலுள்ளார்.அதிக பட்ச ஓட்டம் 248*.

ஒரு நாள் போட்டிகளில் 42 சதங்களுடன் 16361 ஓட்டங்கள் எடுத்துள்ளார் (மார்ச் 4, 2008 ன் படி). அதிகபட்ச ஓட்டம் 186*. ஆனால் சச்சின் ஆடிய முதல் 78 ஒரு நாள் ஆட்டங்களில் சதமேதும் எடுக்கவில்லை என்பது சற்றே விசித்திரம் தான்.

23 முறை சச்சின் 90-99 ஓட்ட இடைவெளியில் வெளியேறி சதங்களை கோட்டை விட்டுமிருக்கிறார்.

ஒருநாள் மற்றும் டெஸ்ட் ஆட்டங்களில் கேட்ச் எடுப்பதிலும் சதமடித்துள்ளார், ஒரு நாள் போட்டிகளில் 122, டெஸ்ட் போட்டிகளில் 100.மிகச்சிறந்த பந்துபிடிப்பாளருமாவார் சச்சின்.

இத்தனை சாதனைகளின் மத்தியில் சோதனைகள் இல்லாமல் இல்லை.

இருமுறை அணித்தலைவர் பொறுப்பு ஏற்றும் அவர் தலைமையின் கீழ் சொல்லத் தகுந்த வெற்றிகளை இந்திய அணி குவிக்கவில்லை.

2001 போர்ட் எலிசபெத்தில் தென் ஆப்பிரிக்க அணிக்கு எதிரான இரண்டாவது போட்டியில் பந்தை சேதப்படுத்தியதாக ஆட்ட நடுவர் மைக் டென்னஸ் சச்சின் மேல் குற்றம் சாட்டி ஒரு டெஸ்ட் போட்டியில் ஆட தடை விதித்தார்.ஆனால் தொலைக்காட்சியில் சச்சின் பந்தை துடைப்பதாக மட்டுமே தெரியவந்தது.இனவெறியினால் (Racism) தான் நடுவர் இவ்வாறு குற்றம் சாட்டுகிறார் என்பது வரை பிரச்சினை பெரிதுபடுத்தப்பட்டது.இதன் பின்னர் சர்வதேச கிரிக்கெட் கவுன்சில் தலையிட்டு தடையை நீக்கியது.இந்திய பாராளுமன்றம் வரை இந்த பிரச்சினை விவாதிக்கப்பட்டது(வேற பிரச்சினைகளே நாட்டில் இல்லையென்பதால்?!)

2003 ல் முழங்கை வலியினால் (Tennis elbow) அவதிப்பட்டு 10 மாதங்கள் சர்வதேசப் போட்டிகளில் பங்குபெற முடியாமலிருந்தார்.

2004 ல் பாகிஸ்தானுடனான டெஸ்ட் தொடரில் 194 ஓட்டங்கள் குவித்து ஆடிக் கொண்டிருந்த போது அணித்தலைவர் திராவிட் ஆட்டத்தை டிக்ளேர் செய்வதாக அறிவித்து சச்சினின் இரட்டை சதத்திற்கு வேட்டு வைத்தார்.அது இன்றும் தனிப்பட்ட முறையில் வருத்தப்படுத்துவதாக சச்சினே கூறியுள்ளார்.

2006 ல் தோள்பட்டை பிரச்சினைக்கு அறுவை சிகிச்சையும் செய்து கொண்டுள்ளார்.போட்டிகளில் பங்கேற்காமலிருந்த அந்த சில மாதங்கள் கபில் தேவ், அந்நாள் பயிற்சியாளர் உள்ளிட்ட பலரும் சச்சின் ஓய்வு பெற வேண்டுமென வலியுறுத்தினார்கள்.அந்த நாட்களை மறக்க நினைக்கிறேன் என்று வருத்தப்படுகிறார் சச்சின் இப்போது.

விருதுகள்

1994 அர்ஜூனா விருது
1997-98 ராஜீவ் காந்தி கேல் ரத்னா விருது
1997-விஸ்டனின் மிகச் சிறந்த வீரர் விருது
1999-பத்மஷ்ரீ விருது
2008-பத்மவிபூஷன் விருது

சச்சினின் ஆட்டத்தில் எனக்கு பிடித்தது

அவரின் அற்புதமான Straight drive (சுனில் கவாஸ்கரே வியக்கிறார் சச்சினின் Straight drive ற்கு), Cover drive மற்றும் Leg flick.
1998 சார்ஜாவில் ஆஸிக்கு எதிரான தொடர்ச்சியான இரு சதங்கள்.
2003 உலகக் கோப்பைப் போட்டியில் பாகிஸ்தானின் சோயிப் அக்தர் பந்து வீச்சில் ஆஃப் சைடில் அவரடித்த சிக்சர்.
2003 உலகக் கோப்பை போட்டியில் இங்கிலாந்தின் ஆன்டி கேடிக்கின் பந்தை மைதானத்திற்கு வெளியே விரட்டிய சிக்சர்.அதோடு கேடிக்கின் வார்த்தை விளையாட்டுகளுக்கு முற்றுப் புள்ளியும் வைத்தார்.
2007-08 ல் காமன்வெல்த் பேங்க் தொடரில் அடித்த இரு சதங்கள்.

சச்சினுக்கு அஞ்சலி என்ற மனைவியும், அர்ஜுன் என்ற மகனும் சாரா என்ற மகளும் உள்ளனர்.

இந்தியாவிற்கு மேலும் புகழ் சேர்க்க சச்சினுக்கு வாழ்த்துக்கள்.

நன்றி மற்றும் தகவல் ஆதாரம்,

wikipedia and cricinfo

நாட்டைக்காப்பவரே தீவிரவாதியானால் என்னவென்பது?

நாட்டைக் காக்க வேண்டிய ராணுவ அதிகாரியே தீவிரவாதத்திற்குத் துணை போனால் என்ன தான் செய்வது? 2006-ல் மகாரஷ்டிரா, மலேகான் பகுதியில் நிகழ்ந்த குண்டு வெடிப்பு மற்றும் 2007ல் சம்ஜக்தா விரைவு ரயிலில் நிகழ்ந்த குண்டுவெடிப்பில் தொடர்பு இருப்பதாக ராணுவ அதிகாரி லெப்டினன்ட் கர்னல்.புரோகித் குற்றம் சாட்டப்பட்டு இன்று 14 நாள் போலீஸ் காவலில் வைக்கப்பட்டுள்ளார்.

நார்கோ அனலிசிஸ் என்ற சோதனையில் மலேகான் குண்டு வெடிப்பில் அவருடைய பங்கை அவரே ஒப்புக் கொண்டுமுள்ளார்.ஒரு குறிப்பிட்ட சமூகத்தினரை பழிவாங்கும் நோக்கத்திலேயே தான் அவ்வாறு செயல்பட்டதாகவும் ஒப்புக் கொண்டுள்ளதாக தெரிகிறது.

என்றாலும் முழுவிசாரணை முடிந்த பின்னரே உறுதியாக எதையும் கூறவியலும் என்று தெரிகிறது.

ஒரு ராணுவ அதிகாரியே தீவிரவாத செயல்களில் ஈடுபட்டிருப்பது நிச்சயமாக ஒரு இந்திய பாமரனுக்கு நல்ல செய்தி அல்லவே. எங்கே போய் கொண்டிருக்கிறோம் நாம்?

நிலவோடு விளையாட வருகிறீர்களா?

சந்திரயான்-1 விண்கலம் இந்தியர்கள் நம்மை எல்லாம் பரவசமும், பெருமையும் கொள்ள வைக்கும் இந்த தருணத்தில் பெயரறியாத ஒரு புகைப்பட கலைஞரின் அற்புதமான சில புகைப்படங்களைத் தொகுத்துள்ளேன்

விண்ணோடும் முகிலோடும் விளையாடும் வெண்ணிலவே என்று அன்று பாடினார்கள்.இங்கே நிலவோடு விளையாடும் இவர்களைப் பாருங்கள்.

மின்னஞ்சலில் பலர் பார்த்திருக்கக் கூடும்.ஆனாலும் இப்புகைப்படங்கள் எத்தனை முறையும் பார்க்கத்தகும் என்றே நினைக்கிறேன்.

புகைப்படம் எடுத்தவருக்கு பாராட்டுக்கள் மற்றும் நன்றி.

(புகைப்பட கலைஞரின் பெயரறிந்தவர்கள் சொல்லுங்கள்)